Mo váidalit

Váidalusa hábmen

Jos áiggut váidalit Siviilaáittardeaddjái, de fertet čállit ja vuolláičállit váidalusa. Sáhtát čállit dábálaš reivve dahje geavahit váidalanskovi. Jos geavahat váidalanskovi, de fertet čálihit ja sáddet dan poastta mielde. Jos váidalat earáid ovddas, de galggat mielddustit fápmudusa. 

Mo vuođuštit váidalusa

Lea mávssolaš ahte nu dárkilit go vejolaš čilget guđe hálddašanorgánii (gielda, direktoráhtta, departemeanta dahje eará) váidalus guoská. Berret maid čilget guđe boasttuvuođa oaivvildat hálddahusa dahkan. Dábálaččat lea doarvái čállit siiddu dahje guokte. Jos oaivvildat dihto mearrádusa leat boastut, berret almmuhit guđe beaivve mearrádus lea dahkkojuvvon, ja áinnas mielddustit mearrádusa kopiija.

Mildosat

Berret bidjat váidalusa mielddusin buot dokumeanttaid, maid jáhkát muitalit mávssolaš dieđuid áššis. Siviilaáittardeaddji kantuvra sáhttá maid viežžat áššedokumeanttaid hálddahusas.

Dárbbašatgo veahki váidalusa čállimii?

Jos du mielas lea váttis čállit váidalusa, sáhtát váldit oktavuođa Siviilaáittardeaddji kantuvrrain ja bivdit rávvagiid áššemeannudeaddjis. Dakkár rávvagiid sáhtát oažžut telefovnnain, dahje sáhtát bivdit áiggi, goas boađát ságastallat áššis deike. Áiggi ferte soahpat ovddalgihtii.