Olgoriikkalaš ja visum: ODI ii leat vástidan

Ali lea eddon go su viellja gii orru Pakistanas ii beasa su guossái boahtit. Islamabada Norgga ambassáda lea hilgon visumohcamuša. Ali lea váidalan hilguma, muhto ii leat gullan maidege Olgoriikkalaččaiddirektoráhtas. E-reivves áittardeaddjái son bivdá áittardeaddji rievdadit hilguma ja cuiggoda direktoráhta njoazes áššemeannudeami.

Áittardeaddji muitala Alii ahte son dahje su viellja ferte vuos čálalaččat jearahit ášši ovdáneami ambassádas dahje Olgoriikkalaččaiddirektoráhtas. Dat lea dábálaš eaktu vai áittardeaddji sáhttá guorahallat ášši lagabut. Áittardeaddji ii danin čieŋo áššái dál.

Jos son dahje su viellja ii oaččo dieđuid váidalusa meannudeamis, son sáhttá sáddet ođđa reivve áittardeaddjái ja váidalit ahte ášši meannuduvvo njozet dahje ahte son ii oaččo vástádusa. Dakkár váidalanreivve ferte vuolláičállit ja danin dan ferte sáddet dábálaš poastta mielde. Ali ferte maid bidjat mielddusin čálalaš fápmudusa iežas vieljas, gii orru Pakistanas. Dasto dárbbašuvvojit vel eanet dieđut ášši birra, earret eará guđe beaivve ohcamuš hilgojuvvui, ambassáda referánsa-/áššenummir ja guđe beivviin váidalanreive ja ođđa jearalda(ga)t ledje beaiváduvvon. Buoremus livččii jos son maid sáhtášii sáddet mielddusin hilgunreivve ja iežas ođđa jearaldatreivviid kopiija.

Eanet dieđuid das maid áittardeaddji sáhttá dahkat ovtta áššis Ali gávdná áittardeaddji neahttasajis, go son vállje jearaldagaid ja vástádusaid. Doppe son oaidná earret eará ahte áittardeaddji ii sáhte ieš rievdadit olgoriikkalaččaideiseválddiid mearrádusa, nu movt Ali sávašii. Áittardeaddji sáhttá baicce cealkit oainnus dan maŋŋá go son lea iskan ášši, maid hálddahusas leat loahpalaččat mearridan.