Virgádeapmi: Fuollabargi virgádeami váidalus

Káre lea ohcan fuollabargi virgái iežas ássangielddas, ja son lei bivdojuvvon maiddái bargojearahallamii. Kárii eai dattetge fállan virggi, son lei evttohasaid gaskkas nubbin. Káre oaivvilda ahte sus lea buoret gelbbolašvuohta go nuppis, gii oaččui virggi, ja son jearrá Siviilaáittardeaddjis iigo son sáhte váidalit virgádeami.

Áittardeaddji vástida Kárii ahte almmolaš hálddahusa virgádeamit gullet áittardeaddji bargosuorgái, ja ahte daid sáhttá váidalit áittardeaddjái. Sutnje fuopmášahttet ahte áittardeaddji sáhttá árvvoštallat gieldda áššemeannudeami ja gelbbolašvuođa árvvoštallama, dattetge nu ahte maŋibun namuhuvvon ášši lea friddja árvvoštallama vuođul dahkkojuvvon mearrádus, man hárrái áittardeaddji sáhttá addit cealkámuša dušše dihto ráddjehusaiguin. Áittardeaddji maid muitala ahte jos Káre gullá muhtin ámmátlihttui, de soaitá gánnehit váldit ášši ovdan dan bokte vuos. Jos son háliida váidalit, de bivdojuvvo Káre čilget guđe virgádeapmái ášši guoská ja guđe boasttuvuohta su oainnu mielde lea dahkkojuvvon. Káre bivdojuvvo maid sáddet mielddusin áššedokumeanttaid, mat sus leat, omd. almmuhusteavstta, ohcamuša jna.