Vearru: Stuorra buohcangoluid sierrageasus

Boahtojagi 2006 vearrodieđáhusas Elle gáibidii stuorra buohcangoluid sierragessosa, kr 10 000. Dábálaš livnnegis son ii ožžon gessosa namuhuvvon goluin. Elle ii lean ovtta oaivilis dainna, mo livnnetkantuvra lei árvvoštallan ášši.

Elle háliida diehtit sáhttágo son váidalit livnnega Siviilaáittardeaddjái. Son riŋge Siviilaáittardeaddjái, gii muitala ahte áittardeaddji ii sáhte meannudit ášši ovdalgo hálddahus lea mearridan dan loahpalaččat. Elle fertege vuos váidalit vearrokantuvrii ja vearrováidalanlávdegoddái.

Njozet meannuduvvon ášši

Elle sáddii váidalusa vearrokantuvrii. Ádjánii guhká ovdalgo son oaččui vástádusa, vaikko son lei jearahan vástádusa vel sierra.

Elle sáhttá váidalit áittardeaddjái, ahte ášši meannuduvvo njozet. Su mielas lea álkit geavahit áittardeaddji váidalanskovi, go čállit reivve. Elle čáliha skovi áittardeaddji ruovttusiiddus. Son deavdá skovi ja sádde dan vejolaš mildosiiguin áittardeaddji poastačujuhussii: Siviilaáittardeaddji, Postboks 3 Sentrum, 0101 OSLO.

Mearrádusa váidaleapmi

Sihke vearrokantuvra ja vearrováidalanlávdegoddi oaivvildii ain ahte Elles ii lean vuoigatvuohta stuorra buohcangoluid sierragessosii boahtojagis 2006.

Elle sáhttá sáddet váidalusa vearrováidalanlávdegotti mearrádusa hárrái Siviilaáittardeaddjái. Son fuolaha ahte sádde váidalusa áittardeaddji váidalanáigemeari siste, mii lea jahki vearrováidalanlávdegotti mearrádusa rájes. Elle čáliha váidalanskovi áittardeaddji ruovttusiiddus. Son deavdá skovi ja bidjá mielddusin kopiija vearrokantuvrra ja vearrováidalanlávdegotti mearrádusas. Váidalanskovi ja dan mildosiid son sádde áittardeaddji poastačujuhussii: Siviilaáittardeaddji, Postboks 3 Sentrum, 0101 OSLO.