Giddagas: luopmoohcamuša hilgun

Jan oaivvilda ahte suinna láhttejit funet giddagasas. Reivvestis áittardeaddjái son govvida árgabeaivvi, ossodaga beaivválaš dagaldumiid ja dihto giddagasbálvváid láhttema. Son muitala maid ahte son lea ohcan luomu vai beasašii galledit bearrašis, muhto ahte su ohcamuš lea hilgojuvvon. Dat ii leat su mielas vuoiggalaš. Son bivdá áittardeaddjis veahki čoavdit váttisvuođaid.

Áittardeaddji čállá vástádusreivvestis Janii, ahte váidalus ferte leat dárkilut, ja ahte lea váttis diehtit masa son dárbbaša veahki. Su bivdet danin čilget ášši dárkileappot. Seammás áittardeaddji almmuha ahte áittardeaddji áššemeannudeapmi lea čálalaš, iige danin leat álki iskat bargiid láhttema. Áittardeaddjái lea maid váttis iskat giddagasa oppalaš dili. Dakkár gažaldagaid son sáhttá váldit ovdan bearráigeahččoráđiin dahje njuolga giddagasain.

Luopmoohcamuša hilguma áittardeaddji sáhttá árvvoštallat, go Jan lea vuos iskan ášši vearredahkofuolahusa regiuvdnakantuvrrain, mii lea váidalaninstánsa. Jos guovlu doalaha hilguma, son sáhttá de váidalit ášši ođđasit. Son berre dalle bidjat mielddusin váidalusmearrádusa kopiija. Eará áššebáhpáriid áittardeaddji viežžá ieš vearredahkofuolahusas.