Huksenášši: Guhkkodat ránnjá rádjái

Biera áigu hukset garáša iežas šilljui. Su šillju lea gárži ja son háliida stuorra garáša, danin lea áidna molssaeaktu mehtera geahčen rájás, man nuppi bealde orru Reidar.

Biera ohcá ja oažžu gielddas lobi sajuštit garáša iežas sávaldaga mielde, vaikko láhka dábálaččat geatnegahttáge doallat njeallje mehtera gaskka ránnjá rádjái.

Reidar váidala mearrádusa fylkkamánnii. Fylkkamánni ii leat ovtta oaivilis Reidariin. Danin dat nanne gieldda addin lobi.

Reidar oaivvilda ain ahte ii lean riekta spiehkastit guhkkodatgáibádusas. Reidar lea dattetge váiban go lea nu ollu šaddan nágget Bierain, iige danin váidal. Beannot jagi geahčen son fas veadjigoahtá smiehttat ášši ja mearrida ođđasit geahččalit bissehit garáša huksema. Reidar váidala áittardeaddjái ja bivdá su árvvoštallat ášši. Áittardeaddjái váidaleami áigemearri lea dattetge jahki hálddahusa loahpalaš mearrádusas, danin Reidar oažžu Siviilaáittardeaddji kantuvrras reivve, mas muitaluvvo ahte ášši lea boarásmuvvan iige sáhte meannuduvvot doppe.

Reidar smiehttá sáhttágo son – dan sadjái go váidalit fylkkamánni mearrádusa – váidalit Biera láhttema. Reidar oaivvilda ahte dat rihkku sihke ránnjálága ja ránnjážiid gaskasaš buriid vieruid. Son riŋgesta danin Siviilaáittardeaddji kantuvrii ja jearrala leago dat dakkár ášši, maid áittardeaddji sáhttá meannudit. Sutnje muitalit dalle ahte áittardeaddji meannuda dušše váidalusaid almmolaš eiseválddiid ektui, ja ahte priváhtarievtti nákkut eai gula su bargosuorgái.